I'M Not Scared- 2003 [இத்தாலி] உயிர் காப்பானா தோழன்???

இப்படத்தின் டிவிடி கவரை பார்த்து மசாலா திரில்லர் படம் என நினைத்து பார்க்க ஆரம்பித்தேன்....  பெரிய ஏமாற்றம்.... மகிழ்ச்சியூட்டிய ஏமாற்றம்.  

முதல் காட்சியே சொல்லி விட்டது.

இது பக்கா 100% உலகசினிமா.

சிறு வயதில் எல்லோருக்குமே ஒரு ரகசிய தேடல் இருக்கும். “அங்கெல்லாம் போகக்கூடாது” என்று எங்கு தடுக்கப்படுகிறோமோ அங்குதான் போக வேண்டும் என்று ஒரு சாகசப்பயணம் நடத்தி விடுவோம்.  இப்படி ஒரு சாகசப்பயணத்தில் துவக்கியிருக்கிறார் இப்படத்தை.... இயக்குனர் Gabriele Salvatores.

இயற்க்கை தனது மொத்த வளத்தையும் கொட்டி வைத்த தெற்க்கத்தி இத்தாலியச்சீமை கிராமம். 

10 வயசு மிஷேல் தனது பரிவாரங்களுடன் கோதுமை வயலினூடே பயணிக்கிறான்.  குட்டித்தங்கை கீழே விழுந்து விட அவளுக்கு உதவி செய்ய பின் தங்கி விடுகிறான்.  ஊருக்கு வெளியே கோபித்து கொண்டு தனியாக ஒரு பாழடைந்த கட்டடம்.  மழலை பட்டாளம் அனைத்தும் ஆஜர்.  கடைசியாக வந்தவருக்கு தண்டனை.  மிஷேல் தங்கைக்கு உதவப்போய் பின் தங்கி விட்டதால் விலக்கு அளிக்கப்படுகிறது.  அப்பாவி குண்டுப்பெண்ணுக்கு தண்டனை வழங்குகிறான் கூட்டத்தின் பாஸ்.


.தண்டனை என்ன தெரியுமா?  ஜட்டியையும் கழட்டி  காண்பிக்க வேண்டும்.  அழுது கொண்டே ஒவ்வொன்றாக கழட்ட  “ஸ்டாப்...இவளுக்கு பதில் நான் தண்டனையை ஏற்க்கிறேன்” என மிஷேல்  
கண்ணபரமாத்மாவாகிறான்.   இவனுக்கு படு ஆபத்தான தண்டனை.

 மரண விளையாட்டை முடித்து விட்டு வீட்டுக்கு திரும்பும் போது தங்கை தனது மூக்கு கண்ணாடியை காணவில்லை என்கிறாள்.திரும்ப தன்னந்தனியே அந்த பாழடைந்த மாளிகைக்கு வருகிறான்.  கண்ணாடி கிடந்த இடத்தில் தரையோடு தரையாக  மறைத்து வைக்கப்பட்ட ஒரு பள்ளத்தை காண்கிறான். 

 மறைவை விலக்கி பார்க்கிறான்.   ஆழத்தில் ஒரு வெளிறிய ஒரு ஜோடிக்கால்கள் மட்டும் தெரிகிறது.

அலறி அடித்துக்கொண்டு பறந்து விடுகிறான்.
லாங் ஷாட்டில்  தெரியும் கால்கள் மிட் லாங், மிட் குளோசப்,  குளோசப் என அருகாமிக்கும்போது  பயத்தில் நாமும் அதிர்வது நிச்சயம்.

அடுத்த நாளும் விடாமல் ஓடி வந்து பார்க்க.... வேம்பயர் போன்று தோற்றமளிக்கும் சிறுவனை பார்த்து மீண்டும் ஓட்டம்.   அடுத்த நாள் அவனுக்கு குடிக்க தண்ணீர்....அதற்க்கு அடுத்த நாள் சாப்பிட பிரட் எனக்கொடுத்து உதவுகிறான்.  இருட்டிலேயே அடைக்கப்பட்டும்...
காலில் சங்கிலியால் பிணைக்கப்பட்டிருப்பதாலும் மனரீதியாகவும்,உடல் ரீதியாகவும்  மிகவும் பாதிக்கப்பட்டிருக்கிறான் அச்சிறுவன்.
வெளிச்சத்தை பார்க்கவே அவனது கண்கள் கூசுகின்றன.

 வீட்டில் இயல்பான வாழ்க்கையை மகிழ்ச்சியாக
கழித்தாலும்  ரகசியமாக நண்பனுக்கு தேவையான அனைத்து உதவிகளையும் மறக்காமல் செய்து விடுவான்.    
வீட்டில் அப்பாவின் நண்பர்கள் ரகசியமாக கூடியிருக்கின்றனர்.அப்போது டிவியில் அடைத்து வைக்கப்பட்ட சிறுவனின் புகைப்படம் காட்டப்பட்டு அறிவிப்பு வருகிறது.மிஷேலும் மறைந்திருந்து பார்க்கிறான்.


சிறுவனின் தாய் கடத்தல்காரர்களுக்கு வேண்டுகோள் விடுக்கிறாள்.
  கடத்தப்பட்ட சிறுவனின் பெயர் பிலிப்போ என்றும்.... கடத்திய கும்பலில் தனது பெற்றோருக்கும் பங்கிருப்பதை உணர்ந்து கொள்கிறான் மிஷேல்.

கிராமத்து நண்பனொருவன் விதவிதமான கார் பொம்மைகளை காட்டி பெருமையடித்து கொள்கிறான்.  மிஷேல் ஒரு காரின் மீது மிகவும் காதல் கொள்கிறான். “ரகசியம் ஒன்றை சொல்கிறேன்...அதற்க்கு பதிலாக காரை தர வேண்டும்”என டிரேடிங் பண்ணி காரை அடைகிறான் மிஷேல்.
அவன் பிலிப்போவை கண்காணித்து வரும் கடத்தல்காரனிடம்  ‘போட்டு’ கொடுத்துவிடுகிறான்.  மிஷேலும் பிலிப்போவும் மாட்டிக்கொள்கிறார்கள்.

மிஷேல் எச்சரிக்கப்படுகிறான்.  பிலிப்போவை இடம் மாற்றி விடுகிறார்கள்.  ஹெலிகாப்டர் ஒன்று கிராமத்தை வட்டமிட்டுச்செல்கிறது.  அன்றிரவு ஊரே ஒன்று கூடி பேசுகிறது.  பிலிப்போவை தீர்த்துக்கட்ட முடிவு செய்யப்படுகிறது.

கொலை செய்யும் பொறுப்பு மிஷேலின் தந்தைக்கு....

காப்பாற்றும் விருப்பு மிஷேலுக்கு....

பிலிப்போ என்னவானான்?????????

விடை படத்தில்.

மிஷேலுக்கு தெரிவதுதான் நமக்கும் தெரியும் விதத்தில் திரைக்கதை அமைக்கப்பட்டுள்ளது.

ஏன் கடத்தப்படுகிறான்?

பணத்திற்க்காகவா?

அரசியல் கொள்கைக்காகவா?

எதுவுமே படத்தில் நேரடியாக சொல்லப்படுவதில்லை.

சொல்லாததுதான் இப்படத்தின் சிறப்பே!!!!